പളനിയമ്മ

കടും തവിട്ടു നിറത്തിലുള്ള സാരി, കറുത്ത തടിച്ച ഫ്രെയിമുകളുള്ള കണ്ണട,
മൂക്കുത്തിയുണ്ട്, തലമുടികളിൽ നര കയറാൻ കുറച്ചു മുടികൾ മാത്രമേ ബാക്കിയുള്ളൂ, തോളിൽ ഒരു ഭാണ്ഡമുണ്ട്, ഒരു കൈയിൽ ഒരു വടി, ചെറുതായ് കൂനുണ്ട്,

പെട്ടെന്ന് ഓർമ്മയിൽ വരുന്ന പളനിയമ്മയുടെ വേഷവും രൂപവും ഇതൊക്കെയായിരുന്നു.

പളനിയമ്മ ഇപ്പോഴുള്ള വീട്ടിൽ ഞങ്ങൾ താമസമാരംഭിച്ചത് മുതൽ വരാറുണ്ട്. എല്ലാ ശനിയാഴ്ചകളിലും ഉച്ചയാകുമ്പോൾ പളനിയമ്മ എത്തും.

ഓർക്കുന്നു പുതിയ വീട്ടിൽ താമസം ആരംഭിച്ച് ഒരാഴ്ച കഴിഞ്ഞപ്പോൾ
അന്ന് ശനിയാഴ്ചയായിരുന്നു, പളനിയമ്മ‌ വീട്ട് മുറ്റത്തേക്ക് കയറിവന്നു.
കോളിങ്ങ് ബെൽ അടിച്ചപ്പോൾ ചെന്ന് നോക്കി,

“എന്തെങ്കിലും കൊടുങ്ക തമ്പി..”
പത്ത് രൂപ എടുത്ത് കൊണ്ട് വന്ന് കൊടുത്തു.
വയസ്സായ അമ്മമാരെക്കാണുമ്പോൾ‌ വല്ലാതെ സങ്കടപ്പെടും മനസ്സ്.
എന്തോ പളനിയമ്മയെ കണ്ടപ്പോഴും എന്തോ വിഷമം തോന്നി.

“എന്നമ്മാ പേര്?”
“പളനിയമ്മ..”
“പളനി‌ കോവിൽ കേട്ടിരിക്കാ?”
“കേട്ടിരിക്കുന്നു അമ്മാ”
“അമ്മ ശാപ്പാട് കഴിച്ചോ?”
“ഒന്നും വേണ്ടപ്പാ..”
“അതെന്താ അമ്മേ അങ്ങിനെ?!”
“അമ്മ,ഇരിക്ക് എന്തെങ്കിലും
കൊണ്ട് വരാം”
“ചോറും,സാമ്പാറും,പപ്പടവും‌,അച്ചാറും
കൊണ്ട് വന്നു കൊടുത്തു.

അത് കണ്ട പളനിയമ്മ ഭാണ്ഡവും വടിയും നടയിൽ‌ വെച്ചു,എഴുന്നേറ്റ് പോയി
കൈ കഴുകി വന്നിരുന്നു,
ഭക്ഷണം കഴിക്കാൻ തുടങ്ങി.
“അമ്മ ഇറച്ചിയോ,കോഴിയോ
കഴിക്കുമോ?"
“മീൻ ഇന്ന് കിട്ടിയില്ല”
“വേണ്ട ഇറച്ചിയും,കോഴിയും ഞാൻ കഴിക്കാറില്ല”
“മീനും,പച്ചക്കറിയും കഴിക്കും”
“ഈ സാമ്പാറ് നല്ല രുചിയുണ്ട്,
ഇത് തന്നെ ധാരാളം”

സാമ്പാറിൽ നിന്നും പച്ചക്കറികൾ‌ കൈയിൽ ഏടുത്ത്‌ വിരലുകൾ കൊണ്ട്
പിഴിഞ്ഞു. എന്നിട്ട് ചണ്ടി പ്ലൈറ്റിന്റെ സൈഡിൽ‌ വെച്ചു.
പിന്നെ പപ്പടവും,അച്ചാറും കൂട്ടി
അമ്മ ഭക്ഷണം കഴിക്കുന്നത് ഞാൻ നോക്കി നിന്നു.
ഭക്ഷണം കഴിഞ്ഞ് അമ്മ വിരലുകളിലുള്ള‌ വറ്റ് വരെ രുചിച്ച്‌ കഴിച്ച് വൃത്തിയാക്കുന്നതും ശ്രദ്ധിച്ചു‌.

“ ഇനി പപ്പടം വേണോ അമ്മേ..?”
“വേണ്ട"
“കുറച്ചു കൂടി ചോറ് കൊണ്ട് വരട്ടെ?”
“വേണ്ടയ്യാ”
“അമ്മക്ക് മക്കളില്ലെ അമ്മേ?"
“ഉണ്ട്, തമ്പി”
“ഒരു മോള് വലിയ ആള്,
കല്ല്യാണം കഴിഞ്ഞ് ഒരു മോളുണ്ട് അവൾക്ക്”
“പിന്നെ രണ്ട് ആണ് മക്കൾ,
എപ്പോ നോക്കിയാലും തണ്ണി‌ സാപ്പിട്ടിരിക്കും,വീട് നോക്കില്ല”
“അവർ നേരെ ഉണ്ടായിരുന്നെങ്കിൽ
ഞാൻ ഇങ്ങിനെ നടക്കണമയിരുന്നോ?”

ചോറ് കഴിച്ച് തീരാറായത് ഞാൻ ശ്രദ്ധിച്ചു,
“ഞാൻ വെള്ളം കൊണ്ട് വരാം അമ്മേ..”
“ചൂട് വെള്ളം വേണോ,അതോ സാധാ മതിയോ?”
“ഒന്നും വേണ്ട നീ അവിടെ ഇരിക്ക്,
ഞാൻ ആ പൈപിൽ നിന്നും കുടിച്ചോളാം”
“അയ്യോ.. അമ്മേ ആ വെള്ളം ഞങ്ങൾ കുടിക്കാറില്ല"
“അത് കുഴൽ കിണറിലെ വെള്ളമാ,
കിണറിൽ നിന്നും കോരിയ
വെള്ളം കൊണ്ട് വരാം ഞാൻ”
“ഞങ്ങൾക്ക് അതൊന്നും പ്രശ്നമില്ല തമ്പീ..”
“നീ അവിടെ ഇരുന്നേ."

പിന്നത്തെ ആഴ്ച അമ്മ‌ വന്നപ്പോൾ പറഞ്ഞു,“തമ്പി എനിക്ക് കാശ് വേണ്ട,
ശാപ്പാട് റെഡി ആയിട്ടുണ്ടെങ്കിൽ അത് മതി”
ഭക്ഷണം കഴിച്ചു പോകുമ്പോൾ സ്ഥിരം നൽകാറുള്ള പത്ത് രൂപയും നൽകി.
വേണ്ട എന്ന് പറഞ്ഞെങ്കിലും
നിർബന്ധിച്ച് കൊടുത്തപ്പോൾ വാങ്ങിച്ചു.

പിന്നെ ശനിയാഴ്ചകളിലെല്ലാം പളനിയമ്മയ്ക്കും ഉച്ചക്കുള്ള ഊണ് റെഡിയാക്കി.
ഇടക്ക് ചില കാരണങ്ങളാൽ വീട്ടിൽ ആരുമില്ലാത്തതിനാൽ പളനിയമ്മക്ക് ശനിയാഴ്ച ഊണ് കൊടുക്കാൻ സാധിച്ചിട്ടുണ്ടാകില്ല.

ഇപ്പോൾ കുറേയായ് വരവ് കുറവാണ്,
ചോദിച്ചപ്പോൾ കുട്ടികളെ പിടുത്തക്കാരെ കാരണം പറഞ്ഞ് എല്ലാവരും പേടിക്കുന്നു. അത് കൊണ്ട് കുറച്ചു നാൾ നാട്ടിലായിരുന്നു എന്ന് പറഞ്ഞു.

വീണ്ടും പളനിയമ്മ ശനിയാഴ്ചകളിൽ വരവ് തുടങ്ങി.
മഴ തുടങ്ങിയതിന് ശേഷം ഒരു പ്രാവശ്യം ‌വന്നിരുന്നു.
ഭക്ഷണം കഴിച്ച്‌ തിരിച്ചു പോകുമ്പോൾ “പറഞ്ഞു സൂക്ഷിക്കണം തെന്നി വീണു പോകരുത്..”
“പേടിയാണ് തമ്പീ നടക്കാൻ,
നാട്ടിൽ പോയിട്ട് മഴ കഴിഞ്ഞ് വരാമെന്ന് തോന്നുന്നു"

ഇടക്ക് തമിഴ് നാട്ടിൽ വെള്ളമില്ലാത്തതിനെക്കുറിച്ചും
രണ്ട് മക്കളുള്ളത് തണ്ണി അടിച്ച് നടക്കുന്നു
വീട് ശ്രദ്ധിക്കുന്നില്ല എന്ന പരാതി വീണ്ടും പറഞ്ഞിരുന്നു.

കഴിഞ്ഞ ശനിയാഴ്ച പളനിയമ്മക്കുള്ള ഭക്ഷണവും ഉണ്ടാക്കി എങ്കിലും വന്നില്ല അവർ.
നാട്ടിലേക്ക് പോയിക്കാണുമെന്ന് ഉറപ്പിച്ചു.

തിങ്കളാഴ്ച പ്രിയപ്പെട്ടവൾക്കും എനിക്കും നോമ്പായിരുന്നു,
കുട്ടികൾ ആരും വീട്ടിൽ ഇല്ലാത്തതിനാൽ രാവിലെയോ ഉച്ചക്കോ ഭക്ഷണവും ഉണ്ടാക്കിയിരുന്നില്ല.

ഉച്ചയ്ക്ക് കോളിങ്ങ് ബെൽ കേട്ട് വാതിൽ തുറന്ന് നോക്കിയപ്പോൾ പളനിയമ്മ നിൽക്കുന്നു വരാന്തയിൽ!
“എവിടെയായിരുന്നു അമ്മേ ശനിയാഴ്ച വന്നില്ലല്ലോ?”
“നാട്ടിൽ പോകുന്നു എന്ന് പറഞ്ഞിട്ട് പോയില്ലേ!?”
“ഇല്ല തമ്പി,ഉടമ്പുക്ക് സുഖമില്ലായിരുന്നു”
“പനിയും ശരീരം വേദനയും അഞ്ചു ദിവസ്സമായി എങ്കെയും പോയിട്ടില്ല"

“ആശുപത്രിയിൽ പോയില്ലേ അമ്മേ?!"
“പോയി ഡോക്ടറെ പാത്ത്”
“മാത്രയും ഗുളികയും തന്നു.
ഇപ്പോൾ നല്ല സുഖമുണ്ട്”

സംസാരിച്ച് കൊണ്ട് തന്നെ പളനിയമ്മഭാണ്ഡവും വടിയും നടയിൽ വെച്ചു,
പൈപ്പിൻ ചുവട്ടിലേക്ക് പോയി കൈ കഴുകി വന്നു.

പെട്ടെന്നാണ് വീട്ടിൽ ഒന്നും ഉണ്ടാക്കിയിട്ടില്ലല്ലോ എന്ന ഓർമ്മ വന്നത്,
അകത്ത് ചെന്ന് പ്രിയപ്പട്ടവളോട് കാര്യം പറഞ്ഞു,

“ഇനിയിപ്പൊ എന്താ ചെയ്യുക?”
“നമുക്ക് ഊണിനുള്ള കാശും കൂടി കൊടുക്കാം,
ഹോട്ടലിൽ നിന്നോ‌ മറ്റോ കഴിച്ചോട്ടെ”
അവൾ തുടർന്നു
“കുറച്ച് നേരം ഇരിക്കുകയാണെങ്കിൽ
എന്തെങ്കിലും വേഗം ഉണ്ടാക്കിക്കൊടുക്കാമായിരുന്നു”
അമ്മയുടെ അടുത്ത് വന്നു പറഞ്ഞു,
“അമ്മേ,ശാപ്പാട് ഇന്നുണ്ടാക്കിയിട്ടില്ല”
“ഇന്ന് തിങ്കളാഴ്ച അല്ലേ,
അമ്മ ഇന്ന് വരുമെന്ന് പ്രതീക്ഷിച്ചില്ല”
“ഞാൻ കാശ് തരട്ടെ,
ഹോട്ടലിൽ നിന്നോ മറ്റോ കഴിക്കാമോ?”
“അതല്ല,കുറച്ച് നേരം ഇരിക്കാമോ?
എന്തെങ്കിലും വേഗം ഉണ്ടാക്കിത്തരാം”

“നീ ഒന്ന് സുമ്മാ ഇരുന്നേ‌ തമ്പീ”
“എനിക്ക് ഇപ്പോൾ വിശപ്പൊന്നുമില്ല
നീങ്ക കൊഞ്ചം സുടു തണ്ണി എടുത്ത് വാ”

“എന്നാൽ എന്തെങ്കിലും ജ്യൂസ് കൊണ്ട്‌ വരാം..”
എന്ന് പറഞ്ഞ് അകത്തേക്ക് പോകുമ്പോൾ അടുക്കള വാതിലിൽ ആരോ മുട്ടുന്ന കേട്ടു, അവൾ ചെന്ന് വാതിൽ തുറന്നു നോക്കിയപ്പോൾ!!
പുറകിലത്തെ വീട്ടിലെ കുഞ്ഞാറ്റ മോൾ ഒരു പാത്രവുമായ് നിൽക്കുന്നു
“എന്താ കുഞ്ഞാറ്റേ ഇത്!?”

“ഇന്ന് കുട്ടന്റെ ഹാപ്പി ബർത്ത് ഡേ യാ”
“അമ്മ വെജിറ്റബിൾ‌ ബിരിയാണി ഉണ്ടാക്കിയതാ..”
പൊട്ടിക്കരയണമെന്ന് തോന്നിപ്പോയി, കണ്ണുകൾ നിറഞ്ഞൊഴുകി.
അവൾ അത് വാങ്ങി കുഞ്ഞാറ്റക്ക് കുറച്ച് ചോക്ലേറ്റ് നൽകി. കുഞ്ഞാറ്റ പോയ ഉടനെ ബിരിയാണിയും ഒരു പ്ലൈറ്റും, സ്പൂണുമായി, അമ്മയുടെ അടുത്ത് വന്നു.

“ഇതെവിടെന്നാ തമ്പീ!?”അൽഭുതത്തോടെ അമ്മ ചോദിച്ചു
“ഇത് ദൈവം കൊടുത്തയച്ചതാ അമ്മക്ക്” ശേഷം അമ്മയോട് വിവരം പറഞ്ഞു “എനിക്കല്ല,ഇത് വഴി തമ്പിക്ക് പുണ്യം തരാൻ,
ആണ്ടവൻ തമ്പിക്ക് കൊടുത്തയച്ചതാ”

അമ്മയ്ക്ക് ബിരിയാണി വിളമ്പി നൽകി അച്ചാറും നൽകി.
കഴിച്ചു‌ കഴിയുന്നത് വരെ  അമ്മയെ നോക്കിയിരുന്നു.