പഴയ കാലുറ

ഷംസുക്കാക്ക് തീരെ വയ്യ
സംസാരിക്കാൻ സാധിക്കുന്നു
എന്ന് മാത്രം
കിടപ്പിലായിട്ട് നാളേറെയായി
ഷംസുക്ക മകൻ ആരിഫിനെ അടുത്ത്
വിളിച്ചു പറഞ്ഞു,“മോനേ ആരിഫേ,എനിക്ക് തീരെ വയ്യ ഞാൻ എപ്പോൾ വേണമെങ്കിലും മരണപ്പെട്ടേക്കാം,

ഞാൻ മരിച്ചു കഴിഞ്ഞാൽ നീ ഈ ഉപ്പാക്ക് ഒരു ഉപകാരം ചെയ്യണം"
ആരിഫ് പറഞ്ഞു,“എന്തിനാണുപ്പാ ആവശ്യമില്ലാത്തതൊക്കൊ ചിന്തിച്ച്
മനസ്സ് വിഷമിപ്പിക്കുന്നത്,എന്റെ ഉപ്പാക്ക് ഒന്നും സംഭവിക്കില്ല"
ഷംസു പറഞ്ഞു,“അതല്ല മോനേ..മരണം അതാർക്കും എപ്പോൾ വേണമെങ്കിലും സംഭവിക്കാം, ഞാൻ എന്തിനാണ് ഇങ്ങിനെ പറയുന്നതെന്ന് നീ ചോദിക്കരുത്.ഇതെന്റെ ആഗ്രഹമാണ് അതായത് ഞാൻ മരിച്ചു കഴിഞ്ഞാൽ
ആ അലമാരക്കകത്ത് കുറച്ച് കീറിയ ഒരു വെളുത്ത കാലുറ അതായത് സോക്സ് ഉണ്ട്,
അത് നീ എന്റെ മയ്യിത്ത് കുളിപ്പിച്ചു കഴിഞ്ഞാൽ എന്റെ മയ്യിത്തിനെ ധരിപ്പിക്കണം,
എതിർപ്പുകൾ ഉണ്ടായേക്കാം
എങ്കിലും നീ ശ്രമിക്കണം”
“ശരിയുപ്പാ..തീർച്ചയായും ഉപ്പാന്റെ ആഗ്രഹം നിറവേറ്റാൻ ഞാൻ ശ്രമിക്കും"
ഇത് പറഞ്ഞതിന്റെ മൂന്നാം ദിവസ്സം ഷംസു മരണപ്പെട്ടു.
മയ്യിത്ത് കുളിപ്പിച്ച് കഴിഞ്ഞപ്പോൾ
ആരിഫ് വേഗം പോയി
ഉപ്പ പറഞ്ഞ കാലുറ അലമാരയിൽ നിന്നും എടുത്ത് കൊണ്ടു വന്നു.
കാര്യം ഉസ്താദിനോട് പറഞ്ഞു
ഉസ്താദ് പറഞ്ഞു,“ഒരിക്കലും ഇത് സാധ്യമല്ല.ഇസ്ലാമിക നിയമപ്രകാരം
കഫൻ തുണിയല്ലാതെ മറ്റൊന്നും മയ്യിത്തിനെ ധരിപ്പിക്കാൻ പാടില്ല"
അരിഫ് പറഞ്ഞു,“എന്റെ ഉപ്പ അവസാനമായ് പറഞ്ഞ ഒരാഗ്രഹമാണ്,അതെനിക്ക് നിറവേറ്റിയേ മതിയാകൂ"
ചർച്ചയായ് ആളുകൾ‌ അഭിപ്രായം പറയാൻ തുടങ്ങി
മറ്റു ഉസ്താദുകളുമെത്തി.
പക്ഷെ പ്രശ്നം പരിഹരിക്കപ്പെട്ടില്ല.
ഇതിനിടയിൽ ഷംസുവിന്റെ ഒരു‌കൂട്ടുകാരൻ ആരിഫിനടുത്ത്‌ ചെന്ന് പറഞ്ഞു,“ഇതാ ഈ കത്ത് നിന്റെ ഉപ്പ എന്നെ ഏല്പിച്ചതാണ്,എന്റെ മയ്യിത്ത് മറ ചെയ്യാൻ കൊണ്ട് പോകുന്നതിന്ന് മുമ്പ് വീട്ടിൽ ചെറിയ ഒരു അഭിപ്രായ വിത്യാസം ഉണ്ടാകും,അപ്പോൾ ഈ കത്ത് നീ എന്റെ മകന് നൽകണമെന്ന് പറഞ്ഞിട്ടുണ്ട്"
ആരിഫ് കത്ത് തുറന്നു വായിച്ചു നോക്കി
“പ്രിയപ്പെട്ട മകനേ,നീ ശ്രദ്ധിച്ചോ,സമ്പത്ത്,വലിയ വീട്,വിലകൂടിയ‌ കാറ്,സ്വന്തമായ് എത്രയോ ബിസിനസ്സ് സ്ഥപനങ്ങൾ എല്ലാം ഉണ്ടായിട്ടും ഒരു കീറിയ കാലുറ പോലും ധരിച്ച് കൂടെ കൊണ്ട് പോകാൻ എന്റെ മയ്യിത്തിന് സാധിക്കുന്നില്ല"
“അത് കൊണ്ട് എന്റെ മകൻ സൂക്ഷിക്കണം ഒരിക്കലും സമ്പത്തിനു‌വേണ്ടി ആരെയും സങ്കടപ്പെടുത്തരുത്”
“ഒരിക്കലും തെറ്റായ മാർഗ്ഗത്തിലൂടെ ധനം സമ്പാധിക്കരുത്"
“ധനം കൊണ്ട് ധർമ്മം ചെയ്യാൻ
തയ്യാറാകണം”
“ഓർക്കണം, മോന...ശരീരത്തിൽ നിന്നും റൂഹ് അതായത് ആത്മാവ് വിട്ടു പോയാൽ, പിന്നെ ഈ ശരീരം വെറും മയ്യിത്താണ് അതായത് മൃതദേഹം
മാത്രം"
“ആ മയ്യിത്തിനോടൊപ്പം, കഫൻതുണി കൂടാതെ കൊണ്ട്‌ പോകാൻ സാധിക്കുക നമ്മൾ ചെയ്ത കർമ്മങ്ങൾ മാത്രമാണ്"
“അത് കൊണ്ട് നല്ലത്‌ ചെയ്യുക,
നമ്മുടെ കൂടെ‌ നല്ല കർമ്മങ്ങൾ കൊണ്ട്‌ പോകാൻ നമുക്ക് സാധിക്കട്ടെ”
“ഇതൊക്കെ അറിഞ്ഞിട്ടും മരണം വരെ
മറ്റാർക്കും ഒന്നും നൽകാതെ ധനം സമ്പാധിച്ചു കൂട്ടാനുള്ള ആർത്തിയോടെ ജീവിക്കുന്ന ആളുകളെപ്പോലെ ആയിപ്പോവരുത് നീ"
“ആ കാലുറ എന്റെ മയ്യിത്തിനെ ധരിപ്പിക്കണ്ട.
നമ്മുടെ ജീവിതം മനസ്സിലാക്കിത്തരാൻ ഉപ്പ നൽകിയ ചെറിയ ഒരു പാഠം മാത്രമാണത്”